Nyiɔ poɛ Kea ‑tooi"
26
Dafi 'a 'dʋ.
‑Ɩn ‑tmʋ 'ma "kpei ‑tɩ' Tʋ "bo,
dɛ ‑nʋɛ ɛmɛ ‑nɩ 'ma nabʋ se ‑kɔ ‑pʋn" nɩ‑,
'ɩn ‑teɛ' 'ma ‑cɛ" 'de Kea 'kwa, 'ma dɩ se jrɔ i.
2 ‑Ɩn ‑gbʋn 'de 'ʋn pɛe o Tʋ "bo, ‑ɩn ‑tɩn' 'mii,
‑ɩn ‑jrɛ" ɛ 'ma pɛe ke 'ma tɔ' i naa sʋn ke‑.
3 ‑Ma nyiɔɔ' ‑tɩ' kmaa'
nɩɛ 'de 'ʋn "jri "kpei.
‑Wɛe ‑ma tɔ' ‑tɩ 'a ‑jeblʋ "i 'bo 'ma naa.
4 'Ɩn ke dɛsaʋnʋɩ 'a ‑tei,
'ɩn ke "jri de pooʋn 'a kpa ‑wa due'.
5 'Ɩn 'nyɛ dɛsaʋnʋʋ 'a "jrui 'kɩɩɛn na' 'ʋn 'ɛ,
'ɩn ke 'diwɔnyniʋn 'a ‑te ‑tadue i.
6 'Ma jreɛ kwa dɛ ‑nʋɛ,
ɛmɛ ‑nɩ 'ɩn se dɛjrɛ' nʋ 'oo Tʋ "bo
‑Bo ɛ nɩ kan' ‑wɛe 'ɩn 'je
‑ma 'sraa ‑sa na' ‑pʋn" 'kpa ka 'je.
7 'De 'ɩn 'je wlu "jɛi kpa
'ɩn 'je ‑mɔ Kea sɛ' po.
‑Wɛe 'dɔe ‑ɩn nʋa 'ʋn "jrii 'ɩn 'jɩ 'tmʋ.
8 Tʋ "bo, 'ma 'jeɛ ‑ma ‑gbu" 'di ‑kwlea' 'a "dia,
‑gbu" ‑ɛ 'di ‑ma 'beɔdɛ nɩa.
9 ‑Ɩn ‑bo 'ʋn dɛsaʋnʋʋ ‑nɩa nmɔ 'kwai o beeɛ
‑wɛe ‑ɩn ‑bo ‑a 'kmʋ ‑saa ‑tadue.
10 Ʋʋa' sʋn nɩɛ 'e dɛsaʋn 'di,
‑wɛe nyʋ ‑sɔn paadɩ "ji ʋʋa' diiansʋn 'di.
11 'Mɔ ɛ, 'maa 'wlʋ wlu "kpei,
‑ɩn ‑seie 'ʋn 'mɔ ‑ɔɔ bae ‑mii'.
12 'Ma bʋ a muɛ i kua' 'de ‑ma "isrɛ ‑jei".
'Ma muɛ Kea "diwan‑ poa'
'de ‑ta nyʋ ‑wi" 'kɩɩan "jrui ɛ.